Samandráttur: Ísland fekk sín fyrsta EM-sigur

EM-fepurin í Føroyum er høgur eftir søguliga stigið ímóti Kroatia í gjár, og í Íslandi er hann neyvan nógv lægri.

Við sigri á Ukraina eydnaðist tað íslendsku kvinnunum at vinna sín fyrsta EM-dyst. 

 - Eg eri so glað. Vit hava glett okkum til hesa kappingina í fýra ár. Vit hava hugsað og tosað um hana til hvørja venjing. Nú hava vit fingið okkara fyrsta sigur, og tað merkir nógv fyri okkum, segði Perla Albertsdóttir.

Íslendski málverjin, Elin Jóna Thorsteinsdóttir, sum føroyingarnir minnast frá undankappingardystinum í Íslandi fyrr í ár, stóð ein branddyst, men hon vildi ikki taka heiðurin fyri sigurin.

 - Eg kenni meg ikki sum eina stjørnu yvirhøvur, tí vit eru eitt lið, og vit gera alt saman. Um eg standi væl, er tað tí at verjan stendur væl, og vit hava eina góða dystarætlan og fylgja henni, segði íslendski málverjin.