Pernille: Framtíðin er ljós

Tað var sorgblítt at siga farvæl við EM-endaspælið, helt føroyski liðskiparin, Pernille Brandenborg, sum kortini smíltist upp um bæði oyru.

Hon hevði júst fingið boðini um, at Føroyar endaðu á 3. plássi í bólkinum frammanfyri Kroatia. Hetta gjørdi so aftur, at føroyingarnir fingu 17. pláss samanlagt og vera hægri styrkismettir til komandi HM-undandystir.

 - Tá tað ikki bleiv til spæl í miðumfarinum, fáa vit vónandi eitt lættari lutakast, sum ger, at vit sleppa til endaspøl aftur, segði Pernille Brandenborg.

Sterki strikuspælarin úr København Håndbold hevur spælt sera væl í Sveis, og tað er hon glað fyri.

 - Eg vil fegin ganga á odda, og eg havi eisini fingið liðskiparabandið, og tað hevur eydnast so nøkulunda, segði hon og gav liðfeløgunum stóran part av æruni fyri síni góðu avrik. 

Pernille Brandenborg heldur sum heild, at framtíðin fyri føroyska kvinnulandsliðið er ljós.

 - Eg vóni, at hetta bara er byrjanin. Eg haldi, at vit hava nógvar evnaríkar spælarar á vøllinum, sum ivaleyst fáa eina stóra hondbóltsframtíð, um tær hava hug til tað. Tað vóni eg, at tær hava, tí tær er super dugnaligar.