Jóannes og Brandur norskir steypavinnarar

Jóannes Bjartalíð og Brandur Hendriksson Olsen fingu báðir stóran leiklut, tá Fredrikstad vann norsku steypafinaluna í fótbólti ímóti Molde.

Teir skoraðu báðir í brotssparkskappingini, sum skuldi til, eftir 120 málleysar minuttir á Ullevaal í Oslo.

Jóannes Bjartalíð byrjaði inni, og Brandur Hendriksson Olsen varð skiftur inn í longdu leiktíðini. Við sigrinum hevur Fredrikstad tryggjað sær evropeiskan fótbólt næsta ár, men tað er longu nú greitt, at tað verður uttan Brand Hendriksson Olsen, sum ikki fær longt sín sáttmála.

Tað var fyrrverandi KÍ-venjarin, Mikkjal Thomassen, sum leiddi Fredrikstad til uppflyting í fjør, og hansara avrik var somikið gott, at svenska stórfelagið AIK Stockholm fór avstað við honum.