Longyearbýurin skal ikki vaksa meira

Norski staturin vil ikki hava Longyearbýin á Svalbard at vaksa seg størri enn hann er nú.

Tí er ætlanin at brúka fleiri millardir krónur til at steðga vøkstrinum og samstundis gera býin meira norskan.

Tað skrivar norska kringvarpið NRK, sum endurgevur miðilin Klassekampen.

Steðga íbúðarbygging

Fyrsta stigið hjá norsku stjórnini er at steðga allari íbúðarbygging í býnum. Talið á bústøðum skal vera tað sama, sum tað var fyri 10 árum síðan.

Í 1990 búðu umleið 1.000 fólk í Longyearbýnum, men í dag búgva nærum 2.600 fólk í býnum. Av hesum eru 64 prosent norskir statsborgarar, og tað er tað minsta, sum hevur verið.

Familjusamfelag

- Longyearbýurin skal ikki vaksa meir. Vit vilja, at býurin skal vera eitt lokkandi norskt familjusamfelag. Átøk til at fremja hetta fara at síggjast aftur í fíggjarlógunum næsti árini, sigur norski tilbúgvingar- og løgmálaráðharrin, Emilie Enger Mehl, sum eisini hevur Svalbard sum málsøki.