Óvist nær radarin á Sornfelli kemur

Tað gongur illa hjá dønum at seta nýggja radaran upp á Sornfelli.

Í 2022 skrivaðu Føroyar og Danmark undir semju um at seta upp lofteftirlitsradara í Føroyum í sambandi við artiska kapasietespakkan, sum danska stjórnin játtaði 1,5 mia. krónur til, har slakar 400 mió. kr. skulu brúkast til radaran á Sornfelli.

Hann skal hava eftirlit við loftrúminum millum Ísland, Noreg og Bretland, og røkkur 300 til 400 kilometrar.

Men tað er óvist, nær radarin kemur, vísa skjøl hjá danska verjumálaráðnum, sum DR hevur fingið innlit í.

Eingin er biðin um at gera radaran, og heldur eingin er biðin um at seta hann upp.

Eftir upprunaligu ætlanini skuldi lofteftirlitsradarin í Føroyum vera klárur at taka í nýtslu í 2028.

Í februar í fjør segði Troels Lund Poulsen, verjumálaráðharri, um radaran, at fýra ár fara til at útvega radaran, og síðani eitt ár til at royna hann.

Tað segði hann í svari til Onnu Falkenberg fólkatingskvinnu. Hann segði eisini, at roynt verður at framskunda hetta.