Knesset samtykkir væntandi vápnahvíldina í dag

Ísraelska tjóðartingið Knesset fer væntandi seinni í dag at atkvøða um og samtykkja vápnahvíldina í Gasa, sum partarnir komu ásamt um í Katar í gjár.

Vápnahvíldin, sum kemur í gildi sunnudagin 19. januar, og sum skal vara í fyribils seks vikur, ber millum annað í sær, at Hamas skal lata 33 ísraelskar gíslar leysar, og Ísrael skal lata eitt enn ókent tal av palestinum leysum, sum í dag sita í ísraelskum varðhaldi.

Semjan sigur eisini, at ísraelskar herdeildir skulu taka seg aftur til eina sonevnda "buffara-sonu" á markinum millum Gasa og Ísrael, og skulu eisini taka seg heilt úr ávísum økjum í Gasa, so fólk, ið eru flýdd undan bumbu- og rakettálopum, kunnu fara heim aftur.

Fleiri samráðingar

Hetta er fyrsta stig av trimum í vápnahvíldini. Hini bæði stigini skulu partarnir samráðast um so hvørt. Sambært BBC verður farið undir at samráðast um annað stigið 16 dagar eftir, at vápnahvíldin er komin í gildi - og tað verður so 4. februar.

Sambært amerikanska forsetanum Joe Biden skal annað stigið hava við sær fullkomna ísraelska afturtøku úr Gasa, og ísraelsku gíslarnir, sum eftit eru, verða latnir leysir. Hetta veldst tó alt um, hvussu fyrsta stigið í vápnahvíldini fer at ganga.

Katar hevur saman við Egyptalandi og USA roynt semju í krígnum millum Ísrael og Hamas.