Sakførarar hjá Navalnyj dømdir fongsulsrevsing

Ein russiskur dómstólur hevur dømt tríggjar av sakførarunum hjá andstøðuleiðaranum Aleksej Navalnyj, sála, í fongsulsrevsing fyri ekstremismu.

Sambært Netblaðnum Mediazona eru teir dømdir millum hálvt fjórða og hálvt sætta árs fongsul.

Aleksej Navalnyj doyði í russiskum fongsli í februar í fjør. Hann var dømdur 30 ára fongsul í Sibiria.

Navalnyj var sjálvur advokatur og russiskur andstøðupolitikari, stríddist ímóti mutri og fanst hvassliga at russiska forsetanum, Vladimir Putin.

Navalnyj sat í fongsli frá 2021, tá ið hann kom heim aftur til Russlands, eftir at hann í Týsklandi hevði fingið viðgerð fyri at verða eitraður við nervaeitri. 

Navalnyj skuldsetti Kreml fyri at hava skipað fyri eitringini.