Allur skattur av húsaleigu í kommunukassarnar

Nú skal allur skattur av húsaleigu fara í kommunukassarnar.

Sum er fáa kommunurnar 45 prosent av bruttoskattinum av húsaleigu.

Men Fíggjarmálaráðið hevur gjørt uppskot um at broyta skattalógina, so kommunurnar fáa allan skattin.

Uppskotið er í samgonguskjalinum, og Kommunufelagið hevur biðið um tað.

Tann kommunan, har sum leigaða húsið er, fær skattin.

Uppskotið kostar landinum 1,7 mió. kr., sigur Fíggjarmálaráðið.

Og tær 1,7 milliónirnar fáa kommunurnar so, verður uppskotið hjá Fíggjarmálaráðnum samtykt.

Uppskotið skal koma í gildi 1. januar 2024, so tað er galdandi fyri farna skattaárið.