Senatið góðkent nýggja fíggjarmálaráðharran

Við 68 atkvøðum fyri og 29 ímóti hevur Senatið í USA samtykt at góðkenna Scott Bessent sum fíggjarmálaráðharra í stjórnini hjá Trump.

Í hoyringini í sambandi við góðkenningina segði Bessent, at hann stuðlar nýggjum tiltøkum móti Russlandi, um forsetin heldur, at tað kann hjálpa til at steðga krígnum í Ukraina.

- Eg taki 100 prosent undir við at herða tiltøkini - serliga móti russisku oljufeløgunum - so mikið nógv, at tey fáa Russland aftur til samráðingarborðið, segði hann.

Búskaparlig gulløld

Bessent, sum er fyrrverandi stjóri í einum íløgufelagi, segði eisini, at hann heldur, at politikkurin hjá Trump førir til 'eina nýggja búskaparliga gulløld'.

Hann segði, at amerikanski tjóðbankin skal vera óheftur av forsetanum í peningapolitikkinum.

Mánadagin vísti Financial Times á fýra keldur, sum siga, at Bessent fer at seta í gildi yvirskipaðan innflutningstoll uppá 2,5 prosent, sum fer at hækka líka nógv hvønn mánað. Tollprosentið kann fara heilt upp í 20 prosent.