Løgmaður á altjóða trygdarráðstevnu í Týsklandi

Aksel V. Johannesen, løgmaður, fer í morgin til München, har hann skal vera við á árligu altjóða trygdarráðstevnuni Munich Security Conference, ið verður frá 14. - til 16. februar.

Á ráðstevnuni verður løgmaður við í pallborðskjaki um trygd í Arktis, og hann fer eisini at hava ymsar politiskar fundir.

Ráðstevnan byrjaði í 1963, og hetta er aðru ferð, at umboð fyri landsstýrið i eru boðin við. 

60 stjórnarleiðarar

Á ráðstevnuni eru umleið 60 stjórnarleiðarar, 150 ráðharrar, umframt serfrøðingar, granskarar og umboð fyri felagsskapir úr øllum heiminum, sum viðgera trygdar- og verjupolitikk.

Aksel V. Johannesen sigur, at nýggjar avbjóðingar eru hvønn dag, og tí skulu vit vera við á øllum pallum, fyri at tryggja føroysk áhugamál í Arktis og Norðuratlantshavi. 

- Trygdarráðstevnan í Týsklandi er eisini gott høvi at hoyra nýggju amerikonsku stjórnina leggja fram sínar ætlanir um Ukraina og samstarvið við Evropa sum heild, sigur løgmaður.