Málið um sjikanu byrjaði longu áðrenn setan

Rættað 13. februar: Í innslagnum verður sagt, at Starvsfelagið var við á fundi tann 22. mai í fjør. Tað er ikki rætt og vit harmast mistakið. Tó hevur Starvsfelagið verið inni í málinum í januar 2022 og í februar í ár.

Bæði leiðslan í sjúkrahúsverkinum og Starvsfelagið vóru í drúgva tíð uppi í málinum um kynsliga happing á sjúkraflutnings-tænastuni. Tey hildu eisini fleiri fundir við leiðaran, áðrenn hann varð sagdur úr starvi. Tað vísa skjølini í málinum.

Í veruleikanum byrjaði málið longu áðrenn vikomandi varð settur formliga í starv, tá Depilsleiðslan og HR leiðarin vildu tosa við hann um nøkur viðurskifti í sambandi við, at hann hevði sett seg í samband við kvinnur á netinum. Maðurin lovaði bót og bata, men so hendi tað aftur, og fleiri ferðir vóru fundir millum leiðsluna í Sjúkrahúsverkinum og viðkomandi um støðuna. Men hetta hjálpti ikki, og 22. mai í fjør fekk viðkomandi ávaring og 4. februar í ár endaði starvssetanin við einari fráfaringaravtalu.