Semja um ráevnisavtalu millum Ukraina og USA

Altjóða miðlar skriva í kvøld, at alt bendir á, at Ukraina og USA eru samd um eina avtalu um ráevni eftir at USA hevur strikað eitt av harðastu krøvunum. 

Londini bæði halda, at avtalan kann føra til, at USA bindir seg til eina langtíðaravtalu um trygd, og tað kann bøta um viðurskiftini við amerikonsku umsitingina.

Financial Times skrivar, at Ukraina fer at skriva undir avtaluna um saman at fáa nakað burturúr ukrainskum ráevnunum, - íroknað olju og gass, eftir at USA slepti kravinum um rættin til 500 milliardir dollarar í møguligum inntøkum burturúr ráevnunum.

Keldur siga við blaðið, at Ukraina hevur fingið nógv betri treytir. 

Ukrainsku keldurnar siga, at avtalan bøtir útlitini hjá Ukraina eftir trý ár í kríggi.

Ukrainska blaðið Ekonomitsjna Pravda skrivar eisini, at londini bæði eru samd um eina avtalu, og at avtalan er dagfest 24.februar.

Sambært AFP-tíðindastovuni, kann avtalan longu undirskrivast fríggjadagin.