USA í Grønlandi: Hetta er MAGArørslan

Tað, sum hendir í Grønlandi í løtuni, snýr seg um kapping millum heimsins stórveldi, og tað snýr seg samstundis um mineralir. Tað sigur Robert Imre, lektari í altjóða politikki á Fróðskaparsetrinum.  

- Hetta er MAGArørslan. Eitt av kjarnumálum hjá hesi rørsluni er at vaksa um landafrøðiliga økið hjá USA. Tí er Grønland, eins og Panamakanalin og Kanada í sjóneykuni hjá USA, sigur Robert Imre. Hann sær tó ikki fyri sær, at Grønland verður ein amerikanskur statur. 

- USA vil hava ræðið á mineralídnaðinum í Grønland. Hetta var eisini galdandi hjá fyrrverandi forseta Joe Biden og hansara fyrisiting. Endamálið er at styrkja USA á altjóða politiskapallinum. Ein liður í hesum er eisini at halda Kina, Russlandi og eisini Evropa burtur frá Grønlandi og mineralunum har.