Óli stórspælandi í Sävehof-hálvfinalu

Óli Mittún var stórspælandi, tá IK Sävehof vann á Ystad í aðru hálvfinaluni í kappingini um svenska meistaraheitið og javnaði til 1-1.

Ungi bakspælarin skeyt ikki minni enn 10 mál upp á 11 royndir í 35-28 sigrinum á heimavølli í Partille. Harumframt átti hann næstseinastu hond á fimm málum hjá heimaliðnum. 

Við sigrinum heldur Óli Mittún lív í vónini um enn eitt svenskt meistaraheiti við IK Sävehof, áðrenn hann skiftir til GOG í donsku deildini í summar.

IK Sävehof og Ystad spæla triðju hálfinaluna skírisdag.