ALS 210 milliónir í avlopi í fjør

Arbeiðsloysisskipanin hevði 210 milliónir krónur í avlopi í fjør.

Hetta er næstbesta úrslit hjá ALS higartil. Tað var bara í 2023, at úrslitið var betri; tá var tað 226 milliónir krónur.

Eginognin hjá ALS er nú komin upp á 1,55 milliardir krónur.

Hóast arbeiðsloysið kvinkaði eitt vet uppeftir í fjør, so var tað tó framvegis sera lítið, og triðja árið á rað var arbeiðsloysið eitt prosent ella minni.

Minsta arbeiðsloysi 11 ár á rað

Arbeiðsloysið í Føroyum var tað minsta ellinda árið á rað samanborið við onnur lond í Evropa, og tað eru bara nøkur heilt fá lond í heiminum, har arbeiðsloysið er minni enn í Føroyum.

- Við munagóðu avlopunum seinastu árini er Arbeiðsloysisskipanin styrkt fíggjarliga, haldførið er gott, og skipanin er fíggjarliga sera væl fyri at standa ímóti bakkøstum, sum kunnu koma, sigur Magni á Deild Olsen, stjóri hjá ALS.

Á heimasíðuni hjá ALS stendur, at um arbeiðsloysið í Føroyum verður tíggju prosent, kann ALS útgjalda arbeiðsloysisstuðul í fýra ár.