Átalu fyri ikki at handfara innlitsumbøn rætt

Tórshavnar kommuna hevur fingið átalu frá Løgtingsins umboðsmanni.

Kommunan fær átaluna fyri ikki at handfara eina innlitsumbøn rætt og fyri at bróta góðan fyrisitingarsið.

Tórshavnar kommuna gav eftir 44 døgum klagaranum noktandi svar uttan at hava givið kunning frammanundan um orsøkina til seinkanina, og nær ein avgerð kundi væntast.

Hetta helt umboðsmaðurin vera átaluvert. Umboðsmaðurin sigur eisini, at grundgevingin fyri at nokta umbønini ikki leyk kravið um grundgeving í fyrisitingarlógini, og at heimildin í innlitslógini, sum kommunan hevði brúkt, kundi ikki brúkast í hesum føri.

Atfinningarsamt

Haraftrat heldur umboðsmaðurin tað vera atfinningarsamt, at Tórshavnar kommuna ikki hevði viðgjørt møguleikan at gera klagaran kunnigan við upplýsingar, sum ikki vóru undantiknar skjalainnliti.

At enda vísti umboðsmaðurin á, at kommunan átti at hildið  klagumálsfreistirnar, sum umboðsmaðurin hevði sett.

Klagarin bað um innlit tann 30. oktober í fjør, og umbønin var ikki avgreidd fyrr enn tann 13. desember, tá kommunan gav klagaranum noktandi svar til umbønina.

Seinni, eftir at klagað varð til umboðsmannin, var játtað klagaranum fult innlit í málið.