Makaskifti um ognir í Hoydølum framvegis ikki avgreitt

Makaskiftið millum Landsstýrið og Tórshavnar kommunu er ikki avgreitt enn.

Málið er skjótt trý ára gamalt.

Býráðið samtykti í gjár, at kommunan góðtekur ynskið hjá landinum um ikki at lata kommununi ognirnar í Hoydølum.

Kommunan skal tí ikki keypa gamla studentaskúlan, men kommununan skal taka við lonunum fyri í mesta lagi 4,5 mió. kr. Lonirnar hava fyribils loyvi til 2026 at standa í Hoydølum.

Sjóvinnuhúsið

Býráðið samtykti eisini, at kommunan kemur við samráðingarkravi móti landinum um at laga mótrokningina hjá landinum fyri íløgur í Sjóvinnuhúsið vísandi til, at landið ikki er farið úr hølunum til væntaða tíð.

Og Tórshavnar kommuna og landsstýrið skulu gera tíðaravmarkaða avtalu um at brúka studentaskúlan til listaligt virksemi, til ætlanin um tjóðsavn í Hoydølum verður framd.