Hákun og teir nærkast meistaraheitinum

Hákun West av Teigum og teir í Füchse Berlin nærkast av álvara fyrsta týska meistaraheitinum.

Høvuðsstaðarfelagið bukaði Melsungen av í oddabrakinum í Max-Schmeling-leikhøllini í Berlin hóskvøldið og er nú einsamalt oddalið í týsku Bundesliguni.

Dysturin, sum bert var javnur fyrsta korterið, endaði 37-29. Mathias Gidsel skeyt heili 15 av málunum hjá heimaliðnum, meðan føroyingurin á høgra vongi skoraði upp á einasta kjansin, sum hann fekk.

Füchse Berlin hevur 52 stig á 1. plássi. Magdeburg er nummar tvey við 51 stigum, og Melsungen er nú á 3. plássi við 50 stigum.

Tríggir dystir eru eftir at spæla hjá berlinrevunum í Bundesliguni. Úti ímóti Stuttgart, heima ímóti Gummersbach og úti ímóti Rhein-Neckar Löwen.

Eftir tað er Final4 í Champions League á skránni. Har møtir Füchse Berlin franska Nantes í hálvfinaluni.