Varðin selt Knassar: Var ongantíð ætlanin at gera tíðindi

- Tað hevur ongantíð verið ætlanin hjá okkum at gjørt tíðindir, sigur Bogi Jacobsen, stjóri í Varðanum, nú tað í dag er blivið almannakunngjørt, at Varðin hevur selt smápartafelagið Knassar, sum eigur og rekur Portal.fo og lýsingaskipanina Vevlýsingar. 

Nýggjur eigari er Sp/f FH, sum er stovnað av Bárði Kass Nielsen og Sverra Egholm.

- Hóast eigaraskifti, verður ikki væntað, at stórar broytingar verða at merkja fyri lesararnar á Portal.fo í fyrstu atløgu, sigur Bárður Kass Nielsen. 

Knassar hevur seinastu árini havt fíggjarligar avbjóðingar. Roknskapurin fyri 2023/24 vísti eitt undirskot upp á 1,5 milliónir krónur, og fíggjarstøðan hin 29. februar í fjør vísti eina negativa eginogn upp á umleið 5,8 milliónir krónur.