Hans Andrias Jacobsen: Sangir úr mínum lívi  

Vann Sement og er aftur á pallinum 

Í sendingini “Sangir úr mínum lívi” hoyra vit hesa ferð um klaksvíkingin Hans Andrias Jacobsen. Hann vann tónleikakappingina Sement fyrr í ár – og dómararnir vóru ovurfegnir. Soleiðis søgdu dómararnir:

“Hann hevur altjóða stig og kann spæla allastaðni í heiminum. Bar seg ógvuliga væl á pallinum og hevur fantastiska rødd.” 

Hetta var ein serstøk framførsla. Tað er langt síðani, at Hans Andrias hevur verið á palli. Hann fór at læra til kokk, og tí varð tónleikurin lagdur til síðis í eina tíð. 

Men heima helt hann fram við at skriva sangir og spæla guitar. Á Sement framførdi hann spildurnýggjar sangir og vísti, at hann hevur ment seg nógv sum tónleikari. 

hans_andrias_1.jpg

Framførdi saman við síni fyrimynd 

Í sendingini greiðir Hans Andrias eisini frá, tá hann í 2015 spældi konsert saman við síni stóru fyrimynd Kára P. 

Hans Andrias var bókaður at spæla dupultkonsert í Tøting í Gøtu saman við Kára P. Hans Andrias var stórfjeppari og dugdi alt tilfarið uttanat. Alt frá Debes og Petersen til solo-útgávurnar. 

Tá Hans Andrias stóð backstage og gjørdi seg kláran at byrja konsertina, hevði hann ongantíð hitt Kára P. 

Brádliga kom fyrimyndin gangandi róliga inn saman við konu síni og beyð stillisliga góðan dag. 

Hans Andrias viðgongur, at hann royndi av øllum alvi ikki at lata seg ávirka av støðuni, men innaní hugsaði hann: “Hevði tú bara vitað, hvussu nógv eg lurti eftir tær heima.” 

Konsertin var ein stór uppliving fyri Hans Andrias, og strikan í ð'inum var, tá Kári P. eftir framførsluna rósti Hans Andriasi fyri sína Beatles-tulking. “Tað var bara heilt perfekt”, sigur klaksvíkingurin brosandi. 

hans_andrias_2.jpg

Caption: 

Mynd: OPHfoto

Í sendingini velur Hans Andrias sangir, sum allir á hvør sín hátt hava serligan týdning fyri hann. Úrvalið fevnir um alt frá mjúkum singer-songwriter tónum til harðan tungmálm. 

- The Beatles – Lucy In the Sky With Diamonds. 

- Slipknot – Spit It Out 

- Metallica – Master of Puppets 

- John Mayer – Slow Dancing In a Burning Room 

- Kári P. – Afturhvarv 

- Bon Iver – Calgary 

- Kings of Leon – Pyro 

- Asgeir Trausti – Dýrð í dauðaþögn 

Longri útgáva av sendingini við Hans Andriasi liggur longu nú á kvf.fo. Her kanst tú hoyra alla søguna, uppliva sangvalið og koma tættari at einum tónleikara, sum hevur nógv upp á hjarta.