Privat vaktarfelag eftirlit við kommunalum vesum í Havn

Almennu vesini í Havn verða brúkt til nógv annað, enn tað tey eru ætlað til, og tí hevur kommunan verið noydd at gera avtalu við privat vaktarfelag, sum heldur eyguni við vesunum.

Tað hevur verið kent, at misnýtarar brúka vesini, og tí kunnu sproytinálir liggja og sløðast, til vanda fyri fólk.

Fríður P. Dalsgarð, tekniskur stjóri í Tórshavnar kommunu, sigur, at sproytinálirnar eru ikki einasti trupulleikin, tí støðini verða eisini brúkt til at selja rúsevni.

Ein háttur at koma hesum til lívs, er at seta fólk at vera á varðhaldi, men tað kann gerast dýrt, tí almennu vesini eru rættiliga nógv í tali. Ein annar háttur er at krevja pengar fyri at brúka tey.

Fríður P. Dalsgarð

Fríður P. Dalsgarð er tekniskur stjóri í Tórshavnar kommunu. 

Eldur

Fríður P. Dalsgarð sigur, at hetta er ein politiskur spurningur at taka støðu til.

Herfyri brann eisini tað størsta almenna vesið í Havn, í Mylnugøtu. Fríður P. Dalsgarð sigur, at tað er ein tryggingarspurningur, sum ikki er avgreiddur enn, men arbeiðið at umvæla vesið varð boðið út. 

Tað vísti seg tó, at tann við lægsta tilboðnum ikki megnaði at gera arbeiðið kortini, og tí varð farið til tann við næst lægsta tilboðnum. Tað felagið kundi ikki gera arbeiðið við so stuttum skotbrá, men helst verður farið undir arbeiðið eftir summarsteðgin.