Útlendingar flugu við dronu nærindis flogvøllinum

Seinnapartin í gjár fekk politiið fatur í einari dronu, sum var ov tætt við flogvøllin í Vágum.

Eisini hevði politiið samband við nøkur fólk, útlendingar, sum flugu við dronuni.

Málið verður nú kannað.

Tvær ferðir í gjár komu fráboðanir um, at dronur vóru ov nær Vága floghavn.

Í fyrra førinum, tað var fyrrapartin, var eingin tikin.Tað var yvir Miðvági.

Seinnu ferðina, tá politiið fann dronufólkini, var við Sørvág.

Ikki er loyvt at flúgva nærri enn fimm kilometrar frá flogvøllinum við dronu.

Brot á hesar reglur vera revsað við sekt. Og dronurnar verða tiknar.

Neyðugt var at steingja flogbreytina eina løtu fyrrapartin í gjár, tí drona var yvir Miðvági. Men flogferðslan var ikki beinleiðis ávirkað.