Aðalorðaskifti í morgin um Arktis

Í morgin verður aðalorðaskifti í løgtinginum um álitið "Føroyar eitt land í arktis", sum Løgmannsskrivstovan og Uttanríkistænastan hava latið úr hondum.

Í álitinum stendur, at tað er ætlað sum grundarlag undir einari breiðari politiskari viðgerð av støðu Føroya í Arktis, og hvussu Føroyar á bestan hátt fyrireika seg til nýggju kringumstøðurnar.

Friðarligt og trygt

Føroyar eru partur av heildarætlanini Kongeriget Danmarks Strategi for Arktis 2011-2020, ið fevnir um Danmark, Grønland og Føroyar. Hendan ætlanin miðar móti at styrkja leiklutin hjá Kongsríkinum sum virknum leikara í Arktis. Málið við ætlanani er eitt friðarligt og trygt Arktis við sjálvberandi búskaparligari menning, ið virðir viðbreknu náttúruna í Arktis, stendur í álitinum.

Í álitinum verða fleiri tilmæli førd fram. Millum annað verður mælt til, at føroyskir myndugleikar seta í verk eftirlits- og fráboðanarskipanir av skipaferðsluni í sjóøkinum kring Føroyar.

Kappingaravlaging

Eisini verður mælt til, at fyri at tryggja, at føroyskar fyritøkur ikki eru fyri kappingaravlaging mótvegis fyritøkum í grannalondunum, eiga tillagingar at verða gjørdar í skattalóggávuni. Mælt verður eisini til at áseta eitt serbúskaparøki fyri Føroyar, tí tað gevur øktar eftirlitsheimildir mótvegis skipum undir fremmandum flaggi.