Ísrael dripið talsmann hjá Hamas

Ísrael hevur dripið Abu Obeida, sum var talsmaður fyri vápnaðu deildirnar hjá Hamas - nevndar Qassam-deildirnar. 

Tað segði ísraelski verjumálaráðharrin, Israel Katz, í gjár.

- Vit lupu á Hamas-talsfólkið hjá hesum kriminella og drápssinnaða felagsskapinum, Abu Obeida. Eg vóni, at hann ikki longur er ímillum okkum, men eg eri eisini varugur við, at eingin í Hamas hevur gjørt viðmerkingar til álopið, segði Netanyahu á stjórnarfundi í gjár.

Ísraelski herurin framdi álopið í samstarvi við trygdartænastuna, Shin Bet.

Kann hitta hinar avrættaðu

Seinni skrivaði Katz á miðlinum X, at Obeida er deyður: 

- Vit hava sloppið okkum av við yvirgangs-talsmannin hjá Hamas, Abu Obeida, í Gasa, og hann er sendur hagar, hann kann hitta allar hinar avrættaðu limirnar í óndskaparins ás - úr Iran, Gasa, Libanon og Jemen, á helvitis botni, skrivar Katz.

- Og skjótt, við herdu átøkunum í Gasa, koma fleiri av hansara kriminellu samstarvsfelagum - drápsmenn og neyðtøkumenn í Hamas - at hitta hann har, skrivar Katz eisini.

Hamas viðgekk leygardagin, at Mohammed Sinwar, sum er hernaðaligi leiðarin hjá Hamas í Gasageiranum, er deyður. 

Ísrael sigur, at tað drap hann í álopi í mai.