Trupult at rinda, um skuldin er ov stór

ES hevur ein felags standard fyri, hvussu almenna bruttoskuldin verður gjørd upp. Á føroyskum eitur standardurin EGS-skuld. EGS merkir Evropeiska Gjaldoyrasamstarvið.

Verður almenna skuldin gjørd upp fyri Føroyar sum EGS-skuld, so verður landið, kommunurnar, grunnar umframt skuldin hjá P/f Eystur- og Sandoyartunlum roknað upp í.

Føroysk EGS-skuld. Búskaparráðið Heystfrágreiðing 2025

Í 2020 varð føroyska EGS-skuldin lutfalsliga høg orsakað av Covid-19. Tá var hon 42 prosent av BTÚ. Tey næstu tvey árini var hon lækkandi og kom í 2022 niður á 28 prosent. Síðan tað hevur hon tó staðið í vøkstri, og er í ár mett til 32 prosent av BTÚ.

Búskaparráðið sigur, at fleiri av teimum størru búskapunum í ES, sum hava eina reglu um, at EGS-skuldin ikki skal vera hægri enn 60 prosent av BTÚ. Grundgevingin er, at ein ov høg skuld kann gera tað trupult hjá einum landi at rinda skuldina aftur, serliga um tað kemur í fíggjarligar trupulleikar. Tað, at Føroyar eru eim pinkubúskapur við einsháttaðum vinnubygnaði í útflutninginum, talar fyri einum lágum skuldarmarki, sigur Búskaparráðið.

Tað merkir, heldur Búskaparráðið, at skuldin helst ikki skal vaksa meiri enn 8 milliardir krónur, og nevnir ætlanir um at gera ein Suðuroyartunnil, sum verður mettur at kosta 4 milliardir krónur, ella 5 við byggirentum. Tað fer so at minka um rásarúmið at gera aðrar íløgur, sigur Búskaparráðið.