Hugsa sum ein skóti

Høvdu øll verið sum skótar, so hevði mótstøðuføri í føroyska samfelagnum verið nógv betri. Tað var boðskapurin, tá tilmælini um heimatilbúgving vórðu almannakunngjørd. Tey siga millum annað, at vit skulu øll klára okkum í tríggjar dagar í eini kreppustøðu, sum til dømis vatntrot ella streymslit. Júst hetta er partur av tí, sum skótarnir læra, tá tey læra at kynda bál, at brúka gasskøk og at gera mat.