Stríðið fyri mannarættindum fær ongan enda

Í ár fyllir Amnesty International Føroyar 60 ár, og framvegis er brúk fyri felagsskapinum.

Tað sigur Turið Maria Jóhansdóttir, aðalskrivari í Amnesty Føroyum.

Um vikuskiftið verður skipað fyri tiltøkum, sum varpa ljós á tað, felagsskapurin arbeiðir fyri.

Hátíðarhald við verkstovum

Gular ballónir og flaggleinkir eru hongdar upp í hølunum hjá  Perluni í Havn, har fyrireikingarnar til 60 ára føðingardagshaldið hjá Amnesty Føroyum eru í gongd.

- Tað er stórt at fylla 60, og tí vildu vit hugsa stórt, sigur Turið Maria Jóhansdóttir.

Skipað verður fyri fleri tiltøkum og verkstovum í samband við føðingardagin, og hátíðarhaldið kalla tey ein mannarættindafestival.

Við tiltøkunum á festivalinum verður varpað ljós á mál, sum Amnesty Føroyar arbeiðir fyri. Herímillum verður ein verkstova um dagføring av fosturtøkulógini.

Nógv er hent seinastu árini

Tá Amnesty byrjaði, var tað ein rørsla fyri eitt nú politiskum fangum og torturi uttanfyri landoddarnar.

Í dag arbeiðir felagsskapurin við fleiri økjum innan mannarættindi í Føroyum.

Her heima er eitt mál rokkið, sum felagsskapurin er serliga errin av, og tað eru betraðu umstøðurnar á neyðtøkuøkinum. 

Sum er, er felagsskapurin á hesum døgum serliga upptikin av uppskotinum um dagførda fosturtøkulóg. 

Arbeiðið heldur fram

Sambært Turið Mariu Jóhansdóttir hevur arbeiðið hjá Amnetsy framevigs ein ómetaliga stóran týdning. 

- Stríðið fyri mannarættindum fær ongan enda. Rættindi verða givin og rættindini verða tikin, sigur hon um støðuna úti í heimi.

Og hóast vit í Føroyum eru ein lítil tjóð, eru vit, sambært Turið Mariu Jóhansdóttir, als ikki komin á mál.

- Eg haldi ongantíð, mann kemur á mál. Tað er altíð nógv at stríðast fyri, sigur hon.

Hoyr samrøðu við Turið Mariu Jóhansdóttir her: