Stabilisatorurin á Smyrli verður í lagi í kvøld

Pumpan, sum skal skiftast í øðrum stabilisatorinum á Smyrli, kemur til Føroya seinnapartin. 

Pumpan í stabilisatorinum í bakborði gjørdist í ólagi um vikuskiftið, og Smyril hevur tí siglt við bert einum stabilisatori, og hann hevur rullað meira enn vanligt. 

Tað tekur ikki langa tíð at skifta pumpuna, og ætlanin er at gera arbeiðið á veg til Suðuroyar í kvøld, sigur Niels Harald Michelsen, skipari á Smyrli. 

Skiparin væntar tó ikki, sum ættin er seinnapartin, at tað fer at rulla so nógv á túrinum av Havnini nú klokkan eitt og av Krambatanga klokkan fýra, men skipið kann trampa nakað.

- Men tað hevur einki við stabilisatorarnar at gera, sigur skiparin.