Bakkafrost leggur seg ikki út í linjuføring

Bakkafrost leggur seg als ikki út í, hvussu landið velur at leggja ein møguligan suðuroyartunnil.

Í tíðindaskrivi sigur Regin Jacobsen, stjóri, at í sambandi við kjakið um linjuføring og møguligar leiðir til ein suðuroyartunnil hevur verið nevnt, at Bakkafrost á ein ella annan hátt skuldi hava áhuga í, hvussu ein møgulig tunnilsleið verður løgd. 

- Tað er ikki rætt, skrivar Regin Jacobsen.

Teitur Samuelsen var fíggjarstjóri í Bakkafrosti til 2014, tá hann bleiv stóri í almenna tunnilsfelagnum, sum tá skuldi gera Eysturoyar- og Sandoyartunnilin. Í 2016 kom hann í nevndina í Bakkafrost, og hann er framvegis nevndarlimur í alifyritøkuni. 

Suðuroyartunnil og semjuskjal, Teitur Samuelsen

Teitur Samuelsen, stjóri í P.f. Suðuroyartunlinum, er eisini nevndarlimur í Bakkafrosti. 

Fimm promillu

27. oktober skrivaði Erling Eidesgaard, varatinglimur fyri Tjóðveldi, í lesarabrævi, at verandi linjuføring bara er best fyri tey fimm promillini av føroya fólki, sum búgva í eysturbygdunum á Sandoynni - og so sjálvandi fyri Bakkafrost í Skálavík.

Og í Facebook-viðmerking mikudagin rør borgarstjórin í Húsavíkar kommunu, sum eisini fevnir um Skarvanes, framundir, at tunnilsfelagið gongur ørindi fyri Bakkafrost.

Í tíðindaskrivi í gjárkvøldið sigur Bakkafrost, at fyritøkan sjálvandi hevur áhuga í, at ferðsluviðurskiftini eru góð - eisini til Skálavíkar, har fyritøkan byggir nýggja smoltstøð. 

- Men Bakkafrost hevur ongantíð hvørki viðmerkt ella umrøtt síni áhugamál við nakran av pørtunum, hvørki so ella so, sigur Regin Jacobsen.