Ferðslan veksur mest í Eysturoyartunlinum

Ferðslan í teimum fýra undirsjóvartunlunum veksur støðugt, og hon veksur mest í Eysturoyartunlinum.

Størsti vøksturin var á leiðini millum Eysturoy og Suðurstreym, har ferðslan fyrstu tíggju mánaðirnar av 2025 er økt við 8,6 prosentum. Fyrstu tíggju mánaðirnar av árinum í ár koyrdu næstan 1,7 milliónir bilar millum Eysturoynna og Suðurstreym, og tað eru 133.000 bilar fleiri í ár enn í fjør. Higartil í ár hava í miðal 5.609 bilar koyrt millum Havnina og Skálafjørðin um samdøgrið.

Næststørsti vøksturin var á leiðini tvørtur um Skálafjørðin, har ferðslan er økt við 7,6 prosentum  upp í næstan 280.000 bilar. Tað er umleið 20.000 bilar fleiri enn sama tíðarskeið í fjør, og nú táttar talið av bilum um dagin í 1.000 bilar.

Sandoyartunnilin

Frítekst tagging: 

Sandoyartunnilin

1.100 bilar í Sandoyartunlinum um dagin 

Ferðslan í Sandoyartunlinum er vaksin við 7,3 prosentum samanborið við í fjør. Higartil í ár hava 331.000 bilar koyrt ígjøgnum Sandoyartunnilin, og tað gevur eitt miðaltal upp á 1.100 bilar um dagin, sum er næstan 100 bilar fleiri um dagin samanborið við sama tíðarskeið í fjør.

Minsti vøkstur er í Vágatunlinum, har ferðslan er økt við góðum fimm prosentum, og í Norðoyatunlinum er ferðslan vaksin við 5,8 prosentum. Og tað er ikki tí, at tað er ein lítil vøkstur kortini, tí higartil í ár hava 47.000 bilar fleiri koyrt í Vágatunlinum og 75.000 fleiri í Norðoyatunlinum.

Samanlagt hava 4,6 milliónir bilar koyrt ígjøgnum allar undirsjóvtunlarnar í Føroyum fyrstu tíggju mánaðirnar av árinum í ár. Tað eru 300.000 bilar fleiri enn sama tíðarskeið í fjør og 450.000 fleiri enn í fyrraárið, tá eingin Sandoyartunnil var.