Ugly Kid Joe kemur at spæla á Voxbotni

Tónleikatiltakið Voxbotn hevur lagt seg væl og virðiliga á odda, tá tað snýr seg um at bóka nøvn til komandi ár. 

Fyrst kunngjørdi Voxbotn heitasta navnið á danska tónleikapllinum Apacha.

Síðani sterkasta føroyska poppnavnið yvirhøvur, Byrta.

Og nú setir Voxbotn trumf á við amerikanska rokkorkestrinum Ugly Kid Joe. Hetta var kunngjørt í sendingini Vikuskiftið í dag. 

Hittaðu stórt í 1992

Ugly Kid Joe hittaði stórt fyrst í nítiárunum við einari rokkinnspæling av hittsanginum "Cats In The Cradle" hjá Harry Charpin á plátuni "Americas Least Wanted" frá 1992.

Sangurin kleiv upprunaliga upp á eitt fyrsta pláss á Billboard Hot 100-hitlistanum, tá hann kom út í desember 1974, men tulkingin hjá Ugly Kid Joe gjørdist eisini eitt topp-10 hitt í fleiri londum.  

Alt annað enn útbrendir

Um nakar hugsar, at Ugly Kid Joe ljóðar sum eitt avdankað rokkorkestur, so kunnu limirnir í bólkinum ikki renna undan aldrinum.

Men teir føroyingar, ið vóru á Copenhell í 2022, fingu sjón fyri søgn um, at har er massar av lívi og knotum eftir í Ugly Kid Joe, sum spældi ein framúrskarandi konsert. 

Hetta sæst eisini aftur á hesar liveframførsluni frá Graspop í Belgia í ár, sum liggur á Youtube. 

Nú fáa so allir føroyingar høvi at uppliva bólkin, tá hann kemur at spæla á Voxbotn 2026, sum verður í Vágsbotni í Havn 27. juni. 

Ugly Kid Joe hittaði eisini við sanginum "Everything About You", ið teir sjálvir hava skrivað, og sum rakti ótrúliga væl ironiska og ótilpassaða tíðarandan millum ung í Vesturheiminum.

"I hate the rain and sunny weather
And I, I hate the beach and mountains too
(And) I don't like a thing about the city, no, no
And I, I, I, hate the countryside too!

And I, hate everything about you!
Everything about you!"