Kappróðrarfelagið NSÍ spent homlubondini: Svein Rógvi skal vera venjari

"Svein Rógvi sum venjari hjá NSÍ!" Tað boðar nevndin í Kappróðrarfelagið NSÍ frá í tíðindaskrivi í kvøld.

"Vit hava gjørt avtalu við Svein Rógva Nielsen Ljósstein, sum verður høvuðsvenjari hjá felagnum komandi kappróðrar ár. Nevndin hevur í longri tíð arbeitt við at styrkja karmarnar rundan um felagið og sett sær fyri at fáa ein venjara, ið kann lyfta okkara manningar til eitt hægri stig."

Í tíðindaskrivinum, sum kann lesast á heimsíðu felagsins, skrivar nevndin, at hon leitað eftir einum venjara, ið kemur úti frá og kann geva felagnum nýggj eygu og nýggja orku.

"Í Svein Rógva hava vit rakt plett. Hann kemur við drúgvum royndum við meira enn 36 árum í kappróðri og einum brennandi áhuga fyri ítrótti og kappróðri, og vit gleða okkum til at arbeiða saman um at menna felagið og skapa karmar fyri framgongd."

Kappróðrarfelagið NSÍ heldur, at seinasta ár var eitt stórt stig framá fyri felagið.

"Vit eydnaðust at manna heili 10 manningar, og tað hevði ikki verið møguligt uttan tað stóra arbeiðið, sum okkara næstformaður Jógvan og hansara toymi átóku sær."