Politiska støðan í Venesuela ógreið

Ógreitt er, hvussu Venesuela verður stjórnað frameftir, sigur Regin Winther Poulsen, journalistur, sum hevur búð í USA og nú er búsitandi í Brasil, nú amerikanski herurin hevur handtikið forsetan í Venesuela, sum skal fyri rættin í New York.

Hann er skuldsettur fyri verið við í at smugla rúsevni til USA.

Hóast nógv fagna, at einaræðisharrin í Venesuela er settur frá valdinum, elvir tað til stúran, at andstøðan í landinum, sum vann valið í 2024, ikki sær út til at sleppa til valdið.

- Beint nú er tað eitt tómrúm. Tað er ein stjórn, sum er viðurkend av USA, men sum ikki er vald av fólkinum, sigur Regin Winther Poulsen.

Tað sýnist sum, at tað týdningarmesta er, at stjórnin aktar USA, sigur hann.

Trump fer eftir oljuni

-  Tað er nokk oljan, sum tað snýr seg um, sigur Regin Winther Poulsen.

Aftaná tíðindafundin hjá amerikanska forsetanum, Donald Trump, sum fyri ein stóran part snúði seg um oljuna í Venesuela, tykist júst oljan, at vera tað, sum amerikanski forsetin, Donald Trump, fer eftir.

Venesuela framleiðir okkurt um eina millión tunnur av olju um dagin og stendur fyri umleið einum fimtaparti av oljugoymslunum í heiminum, sambært altjóða orkustovninum, EIA, skrivar CNN.

Hoyr beinleiðis samrøðu við Regin Winther Poulsen, journalist: