Nærum eingin valfepur í Runavíkar kommunu

Tað sæst ikki aftur í býarmyndini í Runavík, at tað verður kommunuval - umval - um átta dagar, tí einki sæst til nakra valplakat í býarmyndini, og eingin valfundur er enn á skránni, hóast umvalið verður í næstu viku.

Umvalið verður týsdagin tann 13. januar, eftir at táverandi landsstýrismaður í lógarmálum, Bjarni Kárason Petersen, í november í fjør gjørdi av, at umval skuldi vera í kommununi í samband við, at ákæra varð reist móti einum fólki fyri valsvik á kommunuvalinum 12. november 2024. 

Men spurningurin er, hvørt tað verður umval um átta dagar ella ikki, tí fimm býráðslimir í Runavíkar kommunu; teir eru Tórbjørn Jacobsen, borgarstjóri, Tóri Højgaard, varaborgarstjóri, Sigrun Jónsveinsdóttir, Petur Hansen og Jóhan Vest hava stevnt Fíggjarmálaráðnum, eftir at Løgmálaráðið er niðurlagt, og tí skal Føroya rættur í morgin taka støðu til, hvørt stevningin skal hava steðgandi virknað fyri umvalinum ella ikki.