Messan verður tikin í nýtslu sunnudagin

Klokkan 16 sunnudagin verður alment hátíðarhald í Sørvági, tá ið Messan, ið er nýggja sjóvinnusavnið og mentanarhúsið í Vágum, kann takast í nýtslu.

Hetta er ein rættuliga sermerktur bygningur, eitt nú er tekjan á sjálvari samkomuhøllini skrokkurin á einum viðvendum útróðrarbáti. Hesin báturin hevur havt fleiri nøvn, har av tað seinasta, fyri hann varð upphøgdur, var Marna. Tá báturin varð keyptur til Føroya í 1973, nevndist hann Astrid II, og hoyrdi tá til á Tvøroyri. Tað er listamaðurin Poul Skarðenni, ið hevur teknað bygningin.

Verkætlanin byrjaði í 2018; 11. juni í fjør var reisigildi á havnalagnum í Sørvági; 12. juli 2025 var navnið avdúkað, og tað var ein einmælt nevnd, sum valdi uppskotið hjá unga miðvinginum, Ian Nolsøe Joensen -  Messan, til nýggja húsið.

Maritimur mentanardepil

Við modellum av skipum og bátum, myndum, teksti og tilfari, ið verður víst á skíggjum, er ætlanin at lýsa føroysku søguna á sjónum. Harumframt kunnu hølini nýtast til borðhald og framførslur. Tá talan er um borðhald, rúmast 160 fólk í Messuni, og 300 fólk, tá ið uppsetingin bara telur stólar.

Messan stendur við bátahylin í Sørvági.

Tú kanst hoyra samrøðuna við Kára Thorsteinsson, ið er nevndarlimur og samskipari í Messuni, her.