Føroysk sjúkrasystir dømd í stórum telefonsvikamáli

Hanna Christina Gærdum Matras úr Klaksvík er í dag funnin sek í øllum seks ákærunum í málinum, skrivar danska TV2.

Sambært dóminum hevur hon svikað fleiri offur fyri umleið 10 milliónir krónur, og harumframt roynt at fremja svik fyri upp ímóti 37 milliónir krónur aftrat.

Málið verður mett at vera eitt tað størsta av sínum slag í Danmark higartil. 

Føroyska kvinnan hevur verið partur av einum netverki, sum hevur givið seg út fyri at vera frá politinum. Offrini fingu at vita, at tey vóru partur av einum álvarsomum brotsmáli - og at offrini vóru í vanda fyri at missa sínar pengar, um tey ikki samstarvaðu.

Hetta svikmálið er eisini lýst í sendingini á danska TV2: Den falske politikommissær.

Rætturin legði í dóminum dent á, at dømda kvinnan ongantíð royndi at greiða offrunum frá, at hon ikki var frá politinum, og rætturin staðfestir eisini, at hon misnýtti síni umsorganarevni, og at hava fastatøkur á síni offur.

Hanna Cristina Gærdum Matras skal rinda sakarkostnaðin og umleið 1,8 milliónir krónur til eitt av sínum offrum. Harumframt hevur 14 dagar til at rinda góðar 6,7 milliónir til eitt annað offur.

Rætturin metti eisini, at vandi er fyri, at hon kann endurtaka líknandi brotsverk, um hon sleppur leys, og tí verður hon verandi í varðhaldi.

Verjin hjá Honnu hevur kært dómin til hægri rætt - við kravi um frídøming ella, í minsta lagi linari revsing.