Grønland, Danmark og USA samráðast nú um trygdaravtalu

Arbeiðsbólkurin, sum var settur at viðgera viðurskiftini millum Grønland, Danmark og USA fyrr í mánaðinum, er farin til verka.

Samráðingar millum USA, Danmark og Grønland um eina arktiska trygdaravtalu eru byrjaðar, segði amerikanski uttanríkisráðharrin, Marco Rubio, í hoyring í amerikanska senatinum í gjár, skrivar AP-tíðindastovan. 

- Í sambandi við málið um Grønlandi, meti eg, at vit eru í einari góðari støðu í løtuni. Vit hava havt frálíkan fund við NATO-aðalskrivaran. Í roynd og veru eru fundir nú millum okkum, Grønland og Danmark um málið. 

- Og eg haldi, at vit eru farin undir eina tilgongd, sum tryggjar gott úrslit fyri allar partar, segði Marco Rubio í amerikanska senatinum. 

Lars Løkke Rasmussen og Vivian Motzfeldt á tíðindafundi

Danska uttanríkisráðið váttar

Eisini danska uttanríkisráðið hevur váttað, at londini eru farin at fundast, skrivar Reuters.

Danska uttanríkisráðið sigur í skrivligum svari, at embætisfólk úr Danmark, Grønlandi og USA hava hitst fyri at "umrøða, hvussu vit kunnu viðgera amerikonsku stúranina um trygdina í Arktis, samstundis sum vit virða mørkini hjá danska kongsríkinum." 

Tey trý londini gjørdu av at seta ein arbeiðsbólk at viðgera viðurskiftini millum londini á fundi 14. januar, tá danski uttanríkisráðharrin, Lars Løkke Rasmussen, og grønlendska landsstýriskvinnan í uttanríkismálum, Vivian Motzfeldt, hittu Marco Rubio, uttanríkisráðharra, og amerikanska varaforsetan, J.D. Vance í Washington býi