HOYDALAR: Hvør er fyrsta stjørnan?

Í meira enn hálva øld hevur Studentaskúlin í Hoydølum verið fyltur við vitan, vónum, villskapi og ikki minst sangi og tónleiki. Men síðsta pisan úr Hoydølum er langt síðani floygd, og tað hevur verið kvirt alt ov leingi.   

LES EISINI: HOYDALAR: Nýggj sjónvarpsrøð gevur føroyskum sangskattum nýtt lív 

Í Hoydølum fær tónleikurin rúm at anda aftur, tá ið spírarnir koma og blása nýtt lív í føroyska sangskattin og í Hoydalar. 

Í filmsbrotinum niðanfyri síggjast seks ung sangtalentir, ið gita spent, hvør eigur sangskattin, tey skulu tulka í fyrsta parti.

the_beginning_feat._jogvan_olsen.jpg

(Mynd: Bjarni Árting Rubeksen) Spírarnir gera seg klárar til fyrstu upptøkurnar saman við fotografinum.  

Ein stór sjónvarpsframleiðsla  

‘Hoydalar’ er ein stór framleiðsla hjá Kringvarpinum, har nógv arbeiðsorka er løgd í hvønn smálut. Pallur er bygdur serliga til høvið, vakrar gardinur eru seymaðar, og óteljandi tímar eru farnir við leikmanning, venjing, upptøkum og eftirarbeiði. 

Per Zachariassen og Maria Winther Olsen eiga hugskotið og konseptið, og ein stórur partur av programmfólki og fotografum hjá Kringvarpinum er við í framleiðsluni. 

Í hvørjari sending tulka og syngja seks ung sangtalent hvør sítt lag hjá einari kendari føroyskari stjørnu. Vit fylgja teimum frá løtuni, tá ið tey fáa at vita, hvørja stjørnu tey skulu tulka, og fram til stóru framførsluna í auluni í Hoydølum, har stjørnan sjálv eisini kemur á gátt. 

Umframt framførslurnar eru hyggjararnir eisini vitni til samrøður millum tey ungu og stjørnuna, har tosað verður um tónleik, lív og tað at standa á palli.   

Á temasíðu okkara kvf.fo/hoydalar finnur tú eykatilfar, kunning og fráklipp úr sendingini. 

Stjørnan í fyrsta parti  

Men hvør verður so fyrsta stjørnan, ið vitjar Hoydalar? Í fyrsta parti skulu spírarnir gita, hvør eigur fyrsta sangskattin, ið tey skulu tulka. Í filmsbrotinum niðanfyri síggjast tey seks gita spent.

Fyrsti partur av nýggju røðini ‘Hoydalar’ verður vístur hóskvøldið eftir Dag og viku.