Ung vilja verja yngri børn á netinum

Vanliga eru tað vaksin, ið leggja fram lógaruppskot, men í hesari vikuni hava ung roynt seg á politiska pallinum. Ungdómstingið samtykti millum annað at seta 14 ára aldursmark fyri nýtslu av snildfonum og sosialum miðlum. - Vit vilja verja yngri børn, siga uppskotsstillararnir, sum ganga í 8.flokki. 

- Vit noyðast at taka ábyrgd

"Fyrst og fremst vilja vit verja børnini. Vit vita, at tað er skaðiligt - tað hava vit hoyrt ofta. Og vit vita, at foreldur sjálv eru bundin av fartelefonini, so tey klára ikki at taka ábyrgd og seta mørk. Tí máttu vit taka ábyrgd og gera tað fyri tey". 

Tað sigur Sigrún Eyð Halldórsdóttir Fossádal, sum gongur í Skúlanum við Løgmannabreyt. Hon og floksfelagarnir Filip av Reyni, Bára Biritudóttir Biskopstø og Hjørdis Sjóvará Bentsen hava verið umboð fyri skúlan, nú ungdómsting hevur verið á skránni. 

Ung kjakast í Breddanum

Rákið at seta aldursmark á sosialar miðlar sæst kring allan heim. Og nú hava føroysk ung altso yvirhálað okkum vaksnu við at samtykkja aldursmark at brúka sosialar miðlar og snildfonir.

Tað bleiv viðgjørt í Breddanum, har fýra næmingar, sum vóru í ungdómstinginum, luttóku í sendingini. Eisini varð spurt, hvørji útlit eru fyri, at vit fáa eitt veruligt lógaruppskot um aldursmark fyri nýtslu av snildfonum og sosialum miðlum. Allur Breddin kann hoyrast her: Aldursmark á sosialar miðlar