Umsóknir fyri 59 milliónir til gransking

Granskingarráðið hevur fingið umsóknir fyri tilsamans 59 mió. kr. til gransking og arbeiðsmarknaðargransking.

Evstamark at søkja um granskingarstuðul var í gjár, og inn komu 50 umsóknir frá 35 kvinnum og 15 monnum. 

Umsóknirnar eru javnt býttar á náttúruvísindi, heilsuvísindi og hug- og samfelagsvísindi. 

41 verkætlanir eru staðsettar í Føroyum og níggju í øðrum londum. 

Tilsamans verður søkt um slakar 59 mió. kr. Samlaði kostnaðurin av verkætlanunum er 151 mió. kr. 

Fáa svar í seinasta lagi 1. juni

Løgtingið hevur játtað níggju mió. kr. til stuðul til gransking í ár, tað sama sum í fjør.

Fíggingin til arbeiðsmarknaðargransking stavar frá fænum í Frítíðargrunninum, og upp í tríggjar mió. kr. eru tøkar til stuðul í ár.

Nú verður farið undir at kanna umsóknirnar fyri at vita, um tær lúka formligu treytirnar, og síðani skulu útlendskir granskarar meta um vísindaligu góðskuna v.m. í umsóknunum. 

Faknevndin fyri stuðli til gransking tekur endaliga støðu til umsóknirnar, og umsøkjararnir fáa svar í seinasta lagi 1. juni, skrivar gransking.fo.