Finnland ætlar at strika forboðið móti kjarnorkuvápnum

Finska stjórnin boðaði í vikuni frá, at hon ætlar at strika løgfrøðiliga forboðið móti kjarnorkuvápnum í finskum øki.

- Broytingaruppskotið er neyðugt, fyri at hernaðarliga verjan hjá Finnlandi kann gerast partur av Nato-verjusamgonguni, og fyri at fáa fult gagn av felags verjuni hjá NATO, segði finski verjumálaráðharrin, Antti Häkkänen, í gjár.

Uppskotið hevur fingið øði í Kreml, og talsmaðurin, Dmitrij Peskov, sigur í dag, at slík broyting kann vera møgulig hóttan móti Russlandi, skrivar Reuters.

Peskov ávaraði eisini um, at Russland fór at svara aftur, um ætlanin er at seta upp kjarnorkuvápn á finskari jørð - uttan at siga nærri, hvat tað skuldi verið.

Uppskotið skal viðgerast í finska ríkisdegnum, og endalig avgerð er ikki tikin.