Serlingur við stórum hittum høvuðsnavn á G! festivalinum

Um tú kanska ert komin eitt sindur til árs og ikki brúkar TikTok og líknandi sosialar miðlar, so er tað ikki óhugsandi, at tú ongantíð hevur hoyrt um Oliver Tree.

Men tað merkir ikki, at amerikumaðurin úr Kalifonia ikki er ein heimsstjørna, tí tað er hann við milliardum av stroymingum á ymisku stroymingtænastunum av hittum sum "Life Goes On" og "Miss You". 

Og í summar kann Oliver Tree upplivast á Sandinum í Syðrugøtu til ársins G! festival. 

Tað kunnger G! festivalurin í dag. 

Serskøltur

Í sínari lýsing av Oliver Tree skrivar G!, at talan er um ein serskølt, ið altíð er í undarligum klæðum og parykkum, og spælir tónleik, sum liggur eitt stað ímillum popp og tað alternativa, tað fjolluta og tað álvarsama, internetið og veruleikan.

Talan er um 32 ára gamla Oliver Tree Nickell, ið varð borin í heim í Santa Cruz í Kalifornia.

Stóra gjøgnumbrotið fekk Oliver Tree við sangunum "Life Goes On" í 2021 og "Miss You" í 2022.

Higartil hevur hann útgivið tríggjar plátur:

Ugly Is Beautiful (2020)
Cowboy Tears (2022)
Alone in a Crowd (2023)

Hvat: G! festivalurin
Hvar: Syðrugøtu
Nær: 16.-18. juli

Higartil kunngjørd tónleikanøvn:

Clickhaze (FO)
Oliver Tree (US)
Frændur (FO) 
Fantastic Negrito (US)
Guðrið Hansdóttir (FO)
Moyka (NO)
Irah (UK)
Elinborg (FO)
Jerub (UK)
Sakaris (FO)
Døgg Nónsgjógv (FO)
Marianna Winter (FO)
Tunghoyrt (FO)
Lynks (UK)
Alterne (DK/ES/BE)
Bolstad (FO)
Duo Ruut (ES)