Turið rakk upp á 2.000

Turið Arge Samuelsen skrivaði hondbóltssøgu, tá hon rakk upp á 2.000 landskappingarmál í bestu føroysku deildini í gjárkvøldið.

Søguliga málið kom hóskandi frammanfyri egnum viðhaldsfólkum í Høllini á Hálsi í Havn, tá Kyndil vann 38-26 á VÍF, skrivar in.fo.

Kyndilsbakkurin skoraði sítt 11. mál í dystinum, tá 47. minuttir vóru spældir og kom upp á 2.000. Tá eru bert mál í bestu landskappingini tald við og ikki t.d. í steypakappingini ella á landsliðnum. 

Turið Arge Samuelsen er 31 ára gomul og hevur vunnið fýra meistaraheitið og seks steypafinalur saman við Kyndli.

Kyndil hevur longu tryggjað sær annað plássið í finalunum um føroyameistaraheitið, og tí fær stórskjúttin kjansin at leggja eitt FM-heitið afturat í næstum.