Keypiorkan haltar framvegis hjá verkafjøldini

Sonja Jógvansdóttir, samskipari í Verkafólki, leggur nú tøl á sosialu miðlarnar, sum afturvísa uppáhaldinum hjá Johnny í Grótinum, formanni í Búskaparráðnum, um at keypiorkan hjá fólki er vunnin aftur.

- Har manglar ógvuliga nógv í, leggur hon dent á.

Í gjár vísti Sonja Jógvansdóttir, samskipari í fakfelagsfelagsskapinum Verkafólki, á Facebook á stóra prísvøksturin seinastu árini, og hon sigur, at prísvøksturin ger, at keypiorkan framvegis haltar hjá stórum pørtum av verkafjøldini. 

Ítøkiliga vísir hon á, at prísurin á mati og drekka er hækkaður 27,6 prosent í tíðarskeiðnum 2020 - 2025, húsaleiga 42,5 prosent, sethús við rentuútreiðslum 33,3 prosent og el og olja 31,1 prosent:

So keypiorkan er verri enn so vunnin innaftur, leggur Sonja Jógvansdóttir dent á. 

Hon fýlist á, at formaðurin í Búskaparráðnum brúkar miðaltøl, sum ikki neyðturviliga avspegla tað veruliga livaða lívið. 

Og lønarsamráðingar einsamallar loysa ikki trupulleikarnar hjá teimum lægst løntu at fáa endarnar at røkka saman - politisk átøk mugu eisini til:

Í Føroya Arbeiðsgevarafelag vilja tey ikki út í eitt kjak um hagtøl, men taka tað almenna prístalið til eftirtektar. 

- Er ivi um tey tølini, má kjakið takast við tey, sum varða av prístalshagtølunum, sigur Niels Winther, stjóri í Vinnuhúsinum.