Fíggjarfulltrúin: Hatta er eitt mistak

- Hatta er eitt mistak, og eg gangi út frá, at frágreiðingin til fíggjarnevndina verður broytt.

Tað sigur fíggjarfulltrúin í Vinnumálaráðnum, Gunnleyg Árnafjall í stuttari viðmerking, nú tað er greitt, at frágreiðingin, sum hon hevur gjørt saman við aðalstjóranum til Fíggjarnevndina kann seta fíggjarleiðaran á Strandferðsluni í eitt verri ljós, - hetta tí, at upplýsingar vanta í frágreiðingini frá Vinnumálaráðnum, sum stuðla fíggjarleiðaranum í sínum uppáhaldi.

Minnist ikki

Gunnleyg Árnafjall sigur, at hon minnist ikki, at hon sjálv hevur skrivað brævið um munnkurvina frá Johan Dahl, landsstýrismanni, til leiðsluna á Strandferðsluni, og av tí at brævið ikki varð funnið, tá embætisfólk í gjár leitaðu gjøgnum teldupostarnar í ráðnum, ja, so varð tað ikki tikið við.

Spurd, hvi skjalið ikki er journaliserað, sigur Gunnleyg Árnafjall, at samskiftið við Strandferðsluna er so ómetaliga stórt, og at alt ikki kann journaliserast.