Hallur Danielsen: - Vit høvdu brúk fyri høllini, so tað er dupultmoralskt

 - Tíggju prosent av hesi høllini eru fíggjað av danska Fólkatinginum. Tað høvdu vit saktans klárað sjálvi, tað ivist eg ikki í, men tað er veruleikin. Men um alternativið var, at høllin ikki kom, so hevði eg heldur viljað fingið tey 10 prosentini. Vit høvdu brúk fyri hesari høllini.

Tað sigur Hallur Danielsen úr Hondbóltssambandi Føroya.

Samstundis sum hann fegnast um glæsiligu umstøðurnar og flottu úrslitini hjá føroysku hondbóltslandsliðunum, sum nú hava spælt sínar heimadystir við Tjarnir í eitt ár, heldur hann, at tíðin er farin frá, at Føroyar hava umboð á Fólkatingi.

 - Tey grugga arbeiðið í føroysku politisku skipanini, har ein stórur meiriluti er farin undir at royna at finna eina tjóðarsemju til tess, at Føroyar kunnu fáa teir altjóða limaskapir, sum Føroyar hava brúk fyri og tær uttanríkispolitisku heimildirnar, sum føroyska politiska skipanin hevur tørv á, sigur Hallur Danielsen millum annað.