Sjógæti farið á húsagang

Fyritøkan Sjógæti við Norðskála, er farin á húsagang.

Tað hevur leiðslan í fyritøkuni boðað frá í brævi, sum er sent viðskiftafólkunum, og tað váttar Jóhannus Martin Olsen, nevndarformaður, fyri Kringvarpinum. 

Felagið er komið í rasshaft av menningarkvotuni, sum felagið fekk í 2018, og síðan seldi.

Landsrætturin hevur staðfest niðurstøðuna hjá Føroya rætti um, at felagið skal gjalda 50 prosent í skatti av fulla søluprísinum, sum var uppá fleiri tíggjutals milliónir krónur, og tann peningin hevur fyritøkan ikki.

Kærumyndugleikin hevði annars givið Sjógæti viðhald í, at fyritøkan skuldi ikki gjalda skatt av fullu søluupphæddini.

Sjógæti

Keyptu bygning og útgerð

Alt var annars bjart, tá Sjógæti í 2018 fekk menningarkvotu frá landsstýrinum, so farast kundi undir eina verkætlan at roykja makrel til føroyska marknaðin. Sjógæti fekk eina kvotu uppá 900 tons av makreli og 540 tons av sild í fýra ár, og av tí, at mann ikki hevði eitt skip at fiska uppsjóvarfiskin, var ein avtala gjørd við eitt annað reiðarí at fiska makrelin.

Felagið fór í gongd við verkætlanina, ein bygningur varð keyptur á Eiði, maskinur og roykiovnar vóru eisini keyptir og so varð farið til arbeiðis. Men hóast fólk vóru væl nøgd við vøruna, gekk sølan ikki so væl.

Hoyr innslag í útvarpstíðindunum: