400 fólk sluppu ikki við Smyrli í morgun

Tey umleið 400 fólkini, sum skuldu við Smyrli til Havnar í morgun, vóru komin umborð á Smyril á Krambatanga, tá ið boðini komu um, at skipið hevði fingið maskinbrek og mátti avlýsa túrin.

Dánjal Samuelsen, virkandi stjóri á Strandferðsluni, sigur, at arbeitt verður uppá brekið, men enn veit hann ikki, nær skipið er klárt at sigla. Talan er um eitt brek á køliskipanini. 

Tyrlan ger eykatúr

Tyrlan flýgur eykatúr millum Froðba og Havnina klokkan 10:30. Tyrlan fór av Havnini klokkan 10.

Eykatúrur verður flogin um tørvur er á tí. 

Strandferðslan leggur áherðslu á, at ferðandi, sum hava átrokandi tørv at sleppa við, tí tey eitt nú skulu uttanlands, hava fremstu raðfesting. 

Tyrlan tekur 14 ferðafólk og ferðandi vera biðin um at møta við tyrlupallin hálvan áðrenn fráferð ella skjótast gjørligt.