Vága Floghavn fer sjálv at hava tollfría sølu

Vága Floghavn fer sjálv at hava tollfríu søluna á flogvøllinum, tá nýggja farstøðin verður tikin í brúk, væntandi í mai mánaði.

Nevndin fyri Vága Floghavn hevur - av strategiskum orsøkum, sum tey siga - valt at taka útboðið av tax-freesølu aftur, og sjálv reka søluna. Í august varð raksturin var matarstøðum og tax-free sølu í nýggju farstøðini annars boðin alment út, og inn komu tilsamans fimm tilboð, upplýsir Vága Floghavn í tíðindaskrivi.

Jákup Sverri Kass, stjóri í Vága floghavn, vil ikki gera viðmerkingar til avgerðina í dag. Men hann sigur í tíðindaskrivi, at tað er vanligt, at floghavnir sjálvar reka taxfree-sølu. Atlantsflog hevur annars rikið faxfree-søluna á flogvøllinum seinastu árini.

Tíðin búgvin at reka sjálvir

- Vit vilja takka teimum fyri sera gott samstarv, men vit halda tó, at tíðin er búgvin til, at Vága Floghavn yvirtekur raksturin, tá avtalan gongur út, sigur Jákup Sverri Kass.

Floghavnin fer nú at gera avtalur við veitarar, flutningsfeløg og onnur um taxfree-søluna, men longu nú er greitt, at høvuðsveitarin til søluna verður týska heilsølan Heinemann.

Nevndin í Vága Floghavn hevur eisini gjørt av, at felagið, sum eitur Gist & Vist,  fer at reka matarstøðini, tá nýggja farstøðin á flogvøllinum letur upp. Gist & Vist er felag, sum eisini fevnir um Hotel Føroyar, Hotel Tórshavn, Hvonn, Etika og onnur gistingar- og matarstøð.