Ákæruvaldið reist ákæru móti Bakkafrosti

Politiið hevur nú viðgjørt fráboðanirnar frá Heilsufrøðiligu Starvsstovuni um Bakkafrost.

Málið hevur verið viðgjørt í samstarvi við Statsadvokatin í Keypmannahavn. Fráboðanirnar fevndu um fleiri ymisk brot á ymisk regluverk og serlóggávur. Talan hevur verið um rúgvusmikið tilfar at gjøgnumganga og meta um, bæði frá Heilsufrøðiligu Starvsstovuni og frá Bakkafrosti, sigur politiið í tíðindaskrivi.

Tvær ákærur reistar

Avgerð er tikin um at reisa ákæru í tveimum førum, hóast talan upprunaliga var um eitt mál, ið fevndi um fleiri skuldsetingar.

Ákærurnar snúgva seg um brot á flutningskunngerðina, og ákærurit er sent Føroya Rætti, sum ásetur rættarfund í málinum.

Hinar skuldsetingarnar, sum m.a. vóru um brot á lúsakunngerðina í sambandi við lúsateljingar, eru sleptar.  Í summum førum eru skuldsetingarnar sleptar, tí fyrningarfreistin var farin, og í øðrum førum, tí tað varð mett, at prógvbyrðan ikki kundi lyftast.

Drúgv viðgerðartíð

Politiið sigur, at drúgvar viðgerðartíðir eru sum heild ikki nøktandi, heldur ikki í hesum málinum. Hóast tað kunnu vera fleiri góðar orsøkir til, at málsviðgerðin av einum máli dregur út, eiga bæði politi og ákæruvald at tryggja, at viðgerðartíðin verður so stutt sum gjørligt.